Pito (7) ang kumpirmadong patay sa managlahing insidente sa landslide sa Davao Region tungod sa padayon nga pag-ulan nga dala sa shearline.
Sumala sa Provincial ug City Social Welfare and Development Office, upat (4) sa mga biktima ang gikan sa Upper Salazar, Barangay Central, Mati City, Davao Oriental, human matabunan sa midahili nga yuta ang ilang pinuy-anan pasado alas 7:00 sa buntag, Pebrero 20, 2026.
Nailhan ang mga namatay nga sila Habib Anting, amahan; Kharen Anting, usa ka mabdos nga inahan; ug ang ilang duha ka anak nga sila Thahani Anting, 5 anyos, ug Nhor Habiba Anting, 13 anyos. Bisan sa paspas nga responde sa mga rescuer gikan sa CDRRMO Mati, Bureau of Fire Protection ug mga volunteers, wala nay kinabuhi nga narekober ang mga biktima ug gideklarang dead on arrival sa ospital.
Samtang, gikumpirma usab sa lokal nga panggamhanan sa Monkayo, Davao de Oro nga tulo (3) usab ka persona ang namatay sa laing insidente sa landslide nga nahitabo kagabii, tungod gihapon sa padayon nga kusog nga pag-ulan sa rehiyon.
Nasayran nga padayon nga nakasinati og grabeng pag-ulan ang Davao Oriental ug uban pang bahin sa Davao Region tungod sa shearline, nga maoy hinungdan sa pagdahili sa yuta ug nagbutang sa peligro sa mga komunidad sa landslide-prone areas.