Gipahayag ni kanhi Senadora Leila de Lima nga ang pagpirma ni kanhi Presidente Rodrigo Duterte og waiver alang sa iyang mga bank records ngadto sa International Criminal Court (ICC) usa ka lig-on nga timaan nga duna pa kini saktong panimuot.
Nangatarungan si De Lima nga ang maong lakang nagpakita nga nakasabot pag-ayo ang kanhi presidente sa iyang mga desisyon. Gitataw niya nga dili na mamahimong gamiton sa kampo ni Duterte ang rason sa “mental incapacity” o kakuwang sa saktong panghunahuna aron lamang malikayan ang nagpadayon nga imbestigasyon sa ICC bahin sa war on drugs.
Nipadayag usab ang kanhi senadora nga ang pagpirma sa maong dokumento usa ka pormal nga pag-atubang sa proseso, sukwahi sa mga obserbasyon nga maluya na ang panglawas ug panimuot ni FPRRD. Gitapos ni De Lima ang iyang pamahayag pinaagi sa pag-ingon nga kinahanglan barugan sa kanhi presidente ang iyang mga gihimong lakang sa legal nga paagi.