Padayon ang hugot nga pagpangandam sa Malaybalay alang sa umaabot nga Northern Mindanao Regional Athletic Association (NMRAA) 2026, diin ang dakbayan maoy main host sa maong regional sports event.
Sumala kang Malaybalay City Sports Coordinator Al Edrian Antipazado, sukad pa sa miaging tuig nagpadayon na ang regular nga koordinasyon ug meeting tali sa provincial government, city government, ug lain-laing ahensya aron masiguro ang kahapsay sa kalihokan.
Giandam usab ang mga plano sa seguridad, trapiko, ug partisipasyon sa business sector aron masiguro ang kaluwasan ug kahikayan sa maong dako nga kalihokan.
Kapin sa 30 ka sports events ang ipahigayon sa NMRAA, lakip ang athletics, arnis, badminton, boxing, wrestling, wushu, weightlifting, kickboxing, chess, ug e-sports.
Ang uban nga duwa ipahigayon sa lain-laing lugar sama sa Valencia City ug uban pang munisipyo sa Bukidnon, samtang daghang kompetisyon ipahigayon sa Malaybalay City Sports Complex.
Gilauman usab ang pag-abot sa dul-an sa 10,000 ka atleta ug coaches gikan sa tibuok Northern Mindanao, nga ipahimutang sa nagkalain-laing eskwelahan sa Malaybalay ug mga kasikbit nga lugar.
Bisan adunay mga hagit sama sa kakulang sa tubig, gipasalig sa mga organizer nga andam ang dakbayan sa pagdawat ug pag-host sa maong prestihiyosong kalihokan.