Nagdumili si kanhi Senador “Bong” Revilla sa pagpasa og plea sa kasong malversation, nga wala’y girekomendar nga pyansa, dihang miatubang kini pag-usab sa Sandiganbayan alang sa arraignment kon pagbasa sa sumbong karong Lunes, Pebrero 16, 2026.
Tungod niini, ang Sandiganbayan Third Division na ang nagpasa og not guilty plea alang kang Revilla.
Ang nasangpit nga kaso naglambigit sa P92.8 milyones nga ghost flood control project sa Pandi, Bulacan.
Ang Sandiganbayan una nang niduso og not guilty plea alang kang Revilla human kini nagdumili sa pagpasa og plea sa kasong graft nga adunay kalambigitan gihapon sa gikaingong anomalosong proyekto.
Samtang sa gawas sa Sandiganbayan, subling mipaabot sa suporta ang mga supporters sa kanhi Senador, nga nagsinggit sa panawagan nga buhian ang kanhi Senador.
Miatubang usab sa anti-graft court si kanhi DPWH Bulacan engineer Brice Hernandez alang sa arraignment niini.
Ang laing kaubang akusado ni Revilla nga si kanhi DPWH accountant Juanito Mendoza niduso og not guilty plea.