Giakusahan sa Chinese Embassy sa Maynila ang spokesperson sa Philippine Coast Guard (PCG) nga si Commodore Jay Tarriela, nga namakak pag-usab.
Sa usa ka pahayag, giingon ni Chinese Embassy Deputy Spokesperson Guo Wei nga dili tinuod ug layo sa realidad ang pamahayag ni Tarriela nga wala miduol ang mga barko sa PCG sa bisan unsang reef nga ginaangkon sa China.
Gipasabot sa embahada nga sa milabay nga tuig, giingong miduol ang mga aircraft sa PCG sa mga lugar nga giangkon sa China lakip ang Spratly Islands, ug nakalupad kapin sa 200 ka beses ibabaw sa mga reef sama sa Mischief Reef ug uban pa.
Giingon usab nga adunay mga barko sa Pilipinas nga misulod sa mga katubigan duol sa Subi Reef sa unang bahin sa 2026.
Gisaway usab sa Chinese embassy ang pahayag ni Tarriela nga ang China usa ra ka partido sa giilogan nga katubigan, nga matod nila supak sa Declaration on the Conduct of Parties ug sa United Nations Convention on the Law of the Sea (UNCLOS).
Giakusahan usab ang mga personnel sa Pilipinas nga misulay sa pag-angkon sa pipila ka uninhabited features sama sa Sandy Cay ug Escoda Shoal, ug gitumbok usab ang dugay nang presensya sa barko sa Pilipinas sa Second Thomas Shoal.
Dugang pa sa embahada nga dili tinuod nga biktima sa bully ang mga barko sa Pilipinas, gumikan matod nila kanunay usab kining naglayag duol sa mga isla ug bahura nga ginaangkon sa China.
Ang pahayag gisundan sa tubag ni Commodore Tarriela niadtong Pebrero 13, diin iyang gilimod ang alegasyon ug giingon nga wala miduol ang PCG vessels sa mga iligal nga giokupahan nga maritime features sa China sa West Philippine Sea, gawas na lang kung giisip nga teritoryo sa China ang mga lugar sama sa Bajo de Masinloc, Escoda Shoal, Ayungin Shoal ug Pag-asa Island.