Nabulabog ang usa ka gamay’ng lungsod sa Sichuan, China tungod sa usa ka baboy nga gisakay sa drone hinungdan sa lapad nga brownout sa maong dapit.
Sumala sa taho, misulay ang usa ka mag-uuma nga gamiton ang industrial drone aron dalhon ang iyang binuhing baboy paingon sa slaughterhouse.
Matud sa mag-uuma, mas paspas ug mas tipid kini tandi sa pagbiyahe gamit ang trak tungod sa bakilid nga kabukiran sa ilang lugar.
Apan napakyas ang plano human masangit ang drone sa linya sa kuryente tungod sa dili klaro nga panan-aw o poor visibility sa tag-iya.
Tungod niini, nagbitay ang baboy sa ere ug naputol ang suplay sa kuryente sa maong lugar.
Miabot og 10 ka oras una nakabalik ang kuryente uban sa tabang sa 12 ka personnel sa power company.
Gibana-banaang mukabat sa 10,000 yuan (kapin P80,000) ang kantidad sa kadaot niini.
Sa imbestigasyon, nasayran nga nakalapas ang mag-uuma sa balaod tungod sa sobrang kabug-at sa karga ug sa pagpalupad sa drone sulod sa no-fly zone.