Sikop ang usa ka 26-anyos nga lalaki human naaktuhan sa kapulisan nga namaligya og gituohang smuggled nga sigarilyo didto sa Zone 4, Barangay Kibenton, Impasugong, Bukidnon, Pebrero 13, 2026.
Nasakmit gikan sa suspisado ang upat (4) ka reams sa sigarilyo nga walay tukmang dokumento ug dunay gibanabana nga market value nga Php 3,200.00.
Sumala sa report sa kapulisan, nahitabo ang operasyon sa may alas 10:56 sa buntag. Ang suspisado wala na makalihok pa human kini maaktuhi nga nagbaligya sa maong mga ilegal nga produkto, hinungdan sa dinaliang pagkumpiska sa mga ebidensya ug pagdakop kaniya.
Ang suspisado ug ang mga nasakmit nga kontrabando gidala una sa Impasugong Municipal Police Station (MPS) alang sa gikinahanglang dokumentasyon.
Human maproseso, ang mga ebidensya gitugyan ngadto sa Municipal Health Office (MHO) sa Impasugong alang sa tukmang disposisyon.