Gisaway ni kanhing Senador Ramon “Bong” Revilla Jr. ang mga nag-akusa kaniya bahin sa flood control scandal.
Mitambong siya sa padayon nga preliminary investigation sa iyang plunder case sa Department of Justice (DOJ).
Sumala sa kampo ni Revilla, gi-question nila ang reklamo sa plunder gumikan ang iyang mga co-respondents nga sila kanhing DPWH Undersecretary Roberto Bernardo ug ang mga kanhing DPWH engineers nga sila Henry Alcantara ug Gerard Opulencia gipagawas na pagkahuman silang mahimong state witnesses.
Tungod niini, si Revilla ra ug ang mga John ug Jane Does ang nagpabilin nga respondent sa kaso.
Gipunting usab sa kampo ni Revilla ang kalahian sa mga pahayag ni Bernardo, lakip ang petsa, kantidad sa kwarta, ug ihap sa mga deliveries nga una nang giingon nga gihatag sa kanhing senador.
Apan giklaro sa DOJ nga dili pa opisyal nga na-discharge ang mga state witnesses hangtod nga makahatag sila og Certificate of Materiality gikan sa Witness Protection Program.
Matod ni Prosecutor General Richard Anthony Fadullon, dili ang media ang husto nga forum para sa mga pangutana sa kampo ni Revilla.
Samtang, nagpakita usab ang mga supporters ni Revilla sa DOJ, nagprotesta ug gibarugan nga ang mga kanhing DPWH officials ang angayng kasuhan.
Ang sunod nga pagdungog nakatakda sa Pebrero 20, 2026.