Giklaro ni Gilas Pilipinas head coach Tim Cone nga wala pa’y pinal nga lineup alang sa Window 2 sa FIBA Basketball World Cup qualifiers.
Sumala ni Cone, ila pang paninduton ug i-pinal ang lineup sa mosunod nga mga adlaw. Kini ang reaksyon sa coach human nigawas ang listahan gikan sa FIBA bahin sa lineup sa Gilas alang sa nahisgutang window.
Ang mga magduduwa nga nalakip sa maong listahan mao sila: Chris Newsome, RJ Abarrientos, Scottie Thompson, June Mar Fajardo, Cjay Perez, Dwight Ramos, Japeth Aguilar, Kevin Quiambao, Justin Brownlee, Carl Tamayo, AJ Edu, ug Quentin Millora-Brown.
Namatikdan nga wala sa listahan si Kai Sotto, kinsa bag-o lang naulian gikan sa iyang ACL injury. Una nang nagkanayon si Cone nga naglaum sila nga makaapil si Sotto sa dula sa nasudnong pundok.
Gikatakdang makasangka sa Gilas Pilipinas ang New Zealand karong Pebrero 26, samtang ang Australia usab sa umaabot nga Marso 1. Ang duha ka dula ipahigayon sa Mall of Asia Arena.