Mipadayag ang aktres ug environmental advocate nga si Nadine Lustre sa lig-on nga suporta kang kanhi bise-Presidente Leni Robredo, nga gitawag nga labing angay nga kandidato sa pagka-Presidente kung magdesisyon kini nga modagan sa 2028 national elections.
Kini nga pamahayag, gipaguwa ni Nadine kagahapong adlawa, Pebrero 10, 2026 sa House of Representatives, diin mitambong kini sa pagpaila og mga sugyot balaodnon nga adunay kalabotan sa animal welfare ug plant-based health programs.
Sumala niini, ang integridad, kaligdong, ug people-centered nga estilo sa pagpanguna ni Robredo maoy hinungdan sa pagsalig niini, ug andam kining mosuporta ug mangampanya pag-usab sama sa gibuhat sa 2022 elections.
Apan gipasiugda sa aktres nga ang desisyon sa pagdagan sa pagka-Presidente magpabiling personal nga desisyon alang ni Robredo, nga karon nagserbisyo isip alkalde sa Naga City ug wala pa magpamatuod sa tinguha sa pagdagan.