Hapit mamatay ang singer ug gitawag nga “OPM Chief” nga si Ogie Alcasid human kini matuk-an ug mawad-an og panimuot sa tunga-tunga sa selebrasyon sa ilang ika-15 nga wedding anniversary ni Regine Velasquez-Alcasid sa miaging Disyembre.
Sa usa ka interview sa YouTube show nga “KC After Hours,” gisaysay ni Alcasid nga nahitabo ang insidente human sa iyang concert sa isla samtang nakig-estorya kini sa iyang banda. Giangkon sa singer nga wala niin ma-usap og tarong ang gikaon nga manok, hinungdan nga kini nibara sa iyang tutunlan.
Tungod sa kakuwang sa hangin, daling nawad-an og panimuot si Alcasid. Swerte nga anaa sa dapit ang iyang kamagulangang anak nga si Sarah, kinsa usa ka nurse sa Australia. Gihimoan ni Sarah og dinaliang first aid ang iyang amahan pinaagi sa pagpukpok sa likod niini hangtod nga nibalik ang panimuot sa singer.
Matud ni Regine Velasquez, dako ang iyang kahadlok ug trauma sa maong hitabo tungod kay sa pipila ka segundo, abi niini og mawala na ang iyang bana.
Human sa maong kasinatian, gibutyag ni Alcasid nga nagbilin kini og lawom nga realisasyon kaniya nga mubo ra ang kinabuhi ug angay nga hatagan og mas dakong prayoridad ang pamilya.