Nagpabiling dili pa mapuslan ang Bukidnon Airport sa Don Carlos tungod sa wala pa mahuman nga access road o isyu sa road right of way.
Atol sa sesyon sa Sangguniang Panlalawigan, gipatin-aw ni Board Member Atty. Baba Garcia nga ang DPWH Regional Office ang gitawag aron mohatag og katin-awan gumikan ang maong ahensya ang responsable sa dalan, samtang ang CAAP limitado lamang sa pasilidad sa mismong airport.
Gitinguha sa mga opisyal nga mahatagan na og klarong tubag ang maong pagkalangan aron hingpit na nga maablihan ang maong maong tugpahanan sa Bukidnon.
Subay sa maong hisgutanan, mipresenta ug naghatag og update sa kahimtang sa access road paingon sa Bukidnon Airport si Engr. Dwight Villarta, representante sa DPWH Region 10, aron matubag ang pangutana sa publiko.
Sumala kang Engr. Villarta, duha ka proyekto karon ang nagpadayon alang sa access road.
Usa niini mao ang Project ID 24K00332, nga naglangkob sa four-lane pavement gikan sa highway paingon sa airport terminal.
Sa pagkakaron, ang proyekto naa na sa 55.04% ang accomplishment, diin kahinumduman nga nagsugod ang kontrata niadtong October 12, 2024, ug ang orihinal nga target completion date mao ang September 2025.
Apan tungod sa mga isyu og problema nga giatubang, nasuspende ang proyekto niadtong May 5, 2025.