MALAYBALAY CITY – Nag-atubang karon sa usa ka dakong hagit ang pagdumala sa basura sa dakbayan sa Malaybalay human gikumpirma sa City Environment and Natural Resources Office (CENRO) nga hapit na maabot sa maximum capacity ang kasamtangang gigamit nga landfill area sa Barangay Can-ayan.
Sa eksklusibong pakighinabi sa Bombo Radyo kay Dr. Jessie G. Suson, ang City ENRO Officer, gibutyag niini nga gikan sa 7.9 ka hektarya nga aprobado nga landfill, duha ka hektarya na ang hingpit nga napuno ug paspas nga nagkagamay ang maong luna. Luyo nga duna pay 5.9 ka hektarya nga mamahimong kaexpandan, gipahimangnoan niini nga dili kini permanente nga solusyon kung magpadayon ang kakuwang sa disiplina sa katawhan.
Gipadayag usab sa opisyal ang mabalak-on nga datos diin ang matag molupyo sa Malaybalay nagamugna og 0.5 kilograms nga basura matag adlaw.
Sa kadaghan sa populasyon sa siyudad, kini nagpasabot og toneladang basura nga ginatambak matag semana.Kasamtangan, gipahigayon na sa CENRO ang Waste Analysis Characterization Study sa tanang barangay, tulunghaan ug mga establesyemento.
Kini nga pagtuon maoy mahimong basehan sa pag-repaso sa Solid Waste Management Plan sa siyudad nga gikatakdang mo-expire sa tuig 2027.
Nanawagan ang CENRO og dinalian nga aksyon gikan sa matag pamilya nga i-apply ang “Zero Waste” lifestyle aron malikayan ang mas dako pang krisis sa palibot sa umaabot nga mga katuigan.