Hugot nga ipatuman ang “no single use plastic” sa kagamhanan sa dakbayan sa Malaybalay samtang gipaabot ang pagdagsa sa linibo ka mga turista alang sa umaabot nga Kaamulan karong tuiga.
Kini ang gibutyag ni Jessie G. Suson, ang City Environment and Natural Resources Officer diin nakatutok karon ang ilang pagpangandam sa waste management tungod sa gipaabot nga pagdagsa sa mga bisita sugod sa bulan sa Marso hangtod sa Street Dancing Competition sa Abril 18.
Gipasalig ni Suson nga plastar na ang ilang koordinasyon sa Probinsyal nga kagamhanan sa Bukidnon aron masiguro ang kalimpyo sa dakbayan.Gipahigayon na usab ang mga orientation alang sa mga concessionaires o mga tag-iya og booth sa Capitol Grounds.
Ubos sa maong kamanduan, gidili ang paggamit sa cellophane sa mga dry goods ug mga ilimnon sama sa juice.
Giklaro ni Suson nga magpabilin ang exemption alang sa mga pagkaon nga adunay sabaw tungod sa rason sa sanitasyon ug panglawas. Tumong sa maong lakang nga mapabilin ang selebrasyon nga dili makadaut sa palibot.