Mas gipakusgan sa Bukidnon Police Provincial Office (BPPO) ang ilang kampanya batok sa illegal nga druga human narekord ang pagsaka sa ihap sa mga operasyon ug nadakpan sa unang bulan sa tuig 2026.
Sa eksclusibong pakighinabi sa Bombo Radyo kay PCPT. Sheila Joy P. Jangad, tigpamaba sa Bukidnon Police Provincial Office, nga mikabat sa 59 ka operasyon ang gihimo sa kapulisan sa tibuok probinsya sulod lamang sa bulan sa Enero.
Kini miresulta sa pagkadakop sa 72 ka mga suspetsado.Subay sa report, nakumpiska gikan sa maong mga operasyon ang 393.12 ka gramo sa shabu ug 16.18 ka gramo sa marijuana. Ang kinatibuk-ang kantidad sa nasakmit nga illegal nga druga gibana-bana nga mukabat sa P2.6 million.
Gikumpirma usab sa opisyal nga base sa ilang gihimong imbestigasyon, ang supply sa druga dili gihimo sulod sa Bukidnon kon dili ginapasulod ug ginabiyahe lamang gikan sa gawas sa probinsya.
Tungod niini, mas gihugtan pa karon sa kapulisan ang pagbantay sa mga provincial boundaries, ingon man ang mga checkpoints sa nagkalain-laing siyudad ug munisipyo.