Miabot na sa bag-ong record-high nga ₱17.71 trilyon ang kinatibuk-ang utang sa Pilipinas sa pagtapos sa tuig 2025, butang nga gihulagway sa pipila ka ekonomista nga “makapabalaka na alang sa nasod. Sumala sa Bureau of the Treasury, misaka og kapin 10 porsyento ang maong utang kon itandi sa miaging tuig tungod sa padayon nga pagpangutang sa gobyerno alang sa mga proyekto ug sa pagluya sa kantidad sa piso batok sa dolyar.
Bisan pa man sa maong dakong kantidad, gipasalig sa mga economic managers sa administrasyon nga pabilin kining “sustainable” o makaya pa ra sa nasod samtang nagpadayon ang paglambo sa ekonomiya. Apan alang sa mga kritiko ug eksperto, nagkinahanglan kini og dinalian nga pagtagad aron masiguro nga dili mameligro ang panalapi sa Pilipinas sa umaabot nga katuigan.