Gipatuman sa Department of the Interior and Local Government kon DILG ang direktiba ubos sa Memorandum Circular 2026-066 nga gipagawas kaniadtong Enero 29, nga nagdili sa pagbutang og mga pangalan, hulagway, slogan, logo, mga inisyal ug uban pang mga simbolo nga mahimong maglambigit sa bisan kinsang opisyal sa mga proyekto ug dokumento sa gobyerno.
Gihatagan og gibug-aton sa DILG nga ang mga programa nga gipondohan sa gobyerno gikan sa buhis sa katawhan ug dili angay gamiton isip personal political tools, hinungdan nga gimando usab sa ahensya nga tangtangon gilayon ang mga existing materials nga dili mosubay sa polisiya.
Subay niini, si Senate President Pro Tempore Panfilo “Ping” Lacson mipadayag sa hingpit nga suporta niini sa maong direktiba ug miinsistir nga ang mga billboard ug mga karatula nga adunay mga nawong ug mga ngalan sa mga politiko dili angay alang sa serbisyo publiko, tungod kini gikaingong usa ka pamaagi sa pag-angkon og kredito ug mahimo usab nga magpakita sa korapsyon o sobra nga paggasto, dili lamang sa proyekto mismo kondili sa mga ngalan sa mga politiko.
Dugang pa sa Senador, nga ang nasudnong budget kinahanglang magsilbi sa interes sa publiko ug dili gamiton nga himan alang sa personal nga interest sa mga anaa sa gahom.
Gipasiugda usab niini, ang dugay na nga pagduso sa pakigbatok sa mga kalihokan nga gitawag nga “epal”, lakip ang pagbutang sa mas klaro nga mga panalipod sa 2026 nga nasudnong badyet aron mapugngan ang patronage sa politika ug pag-abuso sa pondo sa publiko.