Padayon nga gipaningkamotan sa Katolikong Simbahan sa Diocese of Malaybalay ang pagpalig-on sa importansya sa transparency ug accountability isip baruganan batok sa nagpadayon nga isyu sa korapsyon sa nasud.
Sa pakighinabi sa Bombo Radyo Malaybalay kang Most Rev. Noel P. Pedregosa, D.D., Obispo sa Diocese of Malaybalay, gipasiugda niini nga ang pagkamatinud-anon ug integridad maoy yawe sa pagpalambo sa common good ug sa pagpatuman sa tinuod nga hustisya sa katilingban.
Gipadayag sa Obispo nga bisan unsa pa man ang resulta sa mga lakang batok sa korapsyon, lakip na ang mga proseso sa impeachment nga giduso batok sa pinakataas nga lider sa nasud, angay nga ipatigbabaw ang pagrespeto sa balaod.
Gipasabot usab ni Bishop Pedregosa, nga ang korapsyon usa ka kultura nga mahimo mausab pinaagi sa husto ug padayon nga paggiya, edukasyon, ug hiniusang aksyon.Â