Padayon ang ginahimong imbestigasyon sa kapulisan kalabot sa sunod-sunod nga insidente sa pagpamusil sa nagkalain-laing lugar sa lalawigan sa Bukidnon.
Sa eksklusibong pakighinabi sa Bombo Radyo Malaybalay kang PCpt. Sheila Joy P. Jangad, Spokesperson sa Bukidnon Police Provincial Office, gibutyag niini nga lain-laing motibo ang gitan-aw sa matag kaso sa pagpamusil sa lalawigan.
Sigon sa tigpamaba, nga ang insidente sa Talakag arestado na ang responsable sa krimen, napasakaan na og kaso ug giklasipikar nga personal grudge ang motibo, hinungdan nga gikonsidera kini nga nasulbad na sa bahin sa kapulisan.
Sa lungsod sa Don Carlos, nadakpan na usab ang suspek ug pormal nang napasakaan og kaso, diin personal usab nga away ang gituohang hinungdan sa maong pagpamusil.
Samtang, padayon pa ang lawom nga imbestigasyon sa insidente sa Maramag aron maila ug madakpan ang responsable.
Sa pagpamusil sa Kitaotao, gitouhan sa kapulisan nga land conflict ang posible nga motibo sa insidente, ug aduna nay mga persons of interest nga kasamtangang ginatan-aw sa imbestigasyon.
Giklaro usab ni PCpt. Jangad, nga ang mga insidente gikonsidera nga isolated cases ug wala’y koneksyon sa usag usa.
Aron malikayan ang posibleng pagsubli sa maong mga insidente, padayon ang ginahimong pagpatuman sa search warrant batok sa illegal firearms ug uban pang hinagiban, lakip na ang pagpalig-on sa mga checkpoints ug dugang nga deployment sa kapulisan sa nagkalain-laing lugar sa lalawigan sa Bukidnon.Â