Angol ang duha ka lalaki sa managlahing insidente lsa pagpangdunggab human sila masamdan sa separado nga kaso nga may kalabotan sa utang ug panagbangi, sumala sa kapulisan.
Sa Valencia City, nakaangkon og 10 ka samad dinunggaban ang usa ka 51-anyos nga harvester nga nailhan sa alyas “Toper” sa Purok 7, Sayre Highway, Barangay Bagontaas niadtong Enero 25, 2026, alas 4:00 sa hapon.
Base sa imbestigasyon, samtang nagpagasolina sa iyang motorsiklo ang biktima, miduol ang suspek nga si alyas “Benedicto,” 52 anyos, ug naningil sa giingong utang nga P300.
Human nagdumili ang biktima sa pagbayad, kalit kining gidunggab, hinungdan nga gidala dayon sa balay-tambalanan, samtang nadakpan ang suspek ug narekober ang kutsilyo nga gigamit ug anaa na sa kustodiya sa Valencia City Police Station.
Sa laing bahin, sa Cabanglasan, Bukidnon, giangol usab ang 35-anyos nga lalaki nga nailhan sa alyas “Loloy” sa Purok 6 Tulogan, Barangay Poblacion human gidunggab sa suspek nga si alyas “Botchoy,” 39 anyos, nga nadakpan gilayon sa kapulisan.
Ang biktima nakaangkon og samad dinunggaban sa nawong ug gidala dayon sa balay-tambalanan, samtang ang suspek anaa na sa kustodiya sa Cabanglasan Municipal Police Station alang sa dugang imbestigasyon ug pag-atubang sa mga kasong ipasang-at batok kaniya.