Direktang gisupak ni Senate President Pro Tempore ug Blue Ribbon Committee Chairman Panfilo “Ping” Lacson ang gipagawas nga “minority report” sa pipila ka mga mambabalaod kalabot sa imbestigasyon sa bilyon-bilyong flood control scandal.
Matod ni Lacson, ang maong report usa ka timailhan sa “kawala’y respeto” sa mga balaod sa Senado ug sa institusyon mismo. Giklaro sa senador nga ubos sa mga rules sa Senado, ang usa ka committee report mahimo lamang i-report out o hisgutan sa plenaryo kon kini aprobado sa mayorya sa mga miyembro sa komite, ug dili pinaagi sa pipila lang ka sakop sa minority bloc.
Dugang pa sa senador, dili angay nga maghimo og kaugalingong report ang minorya samtang nagpadayon pa ang imbestigasyon sa komite. Alang kaniya, ang maong lihok daw usa ka “media stunt” lamang ug walay lig-on nga basehan ubos sa balaod sa lehislatura.
Kahinumduman nga ang maong minority report, nga gipirmahan nila ni Senador Imee Marcos ug Rodante Marcoleta, nagpunting nga manubag ang ubang mga opisyal apan gibutyag ni Lacson nga ang ebidensya nga nakuha sa iyang gipangulohan nga hearings mao nay nakatabang sa pagpasaka og mga kaso sa korte batok sa mga nalambigit.
Gihagit usab ni Lacson ang mga miyembro sa minorya nga imbes mokuwestiyon sa gawas, mas maayo nga motambong sila sa mga hearing aron didto ipagawas ang ilang mga ebidensya ug sugyot nga amendments sa opisyal nga committee report.