Nakuhaan og nagkadaiyang butang ang duha ka residente sa Zone 5, Barangay Kinawe, Libona, Bukidnon human mahitabo ang usa ka insidente sa pagpangawat sa maong lugar.
Sumala sa kapulisan, nadawat nila ang tawag gikan sa Barangay Chairman sa Barangay Kinawe nga nagreport sa nahitabong kawat, hinungdan nga dali-daling miresponde ang mga personnel sa Libona Municipal Police Station ubos sa pagpanguna ni PCPT Erwin James D. Tabequero, OIC, aron susihon ang sitwasyon.
Sa inisyal nga imbestigasyon, nasuta nga sa balay sa unang biktima, usa ka 45-anyos nga lalaki, namatikdan nga abli na ang likod nga pultahan sa alas 6:20 sa buntag apan walay timailhan sa pugos nga pagsulod, samtang ang ikaduhang biktima, usa ka 54-anyos nga lalaki, nakuhaan og Bluetooth speaker nga gibutang duol sa partially open nga bintana.
Ang unang biktima nakuhaan og microwave oven, duha ka 32-inch nga TV, Casio nga relo, cellphone, duha ka backpack, duha ka pares sa sapatos, ug kwarta nga nagkantidad og Php4,000.00, samtang ang ikaduhang biktima nawad-an usab og usa ka Bluetooth speaker.
Sa imbestigasyon sa kapulisan, nasayran nga walay CCTV camera sa mga balay sa mga biktima ug sa kasikbit nga mga lugar, ug padayon pa ang lawom nga imbestigasyon sa Libona MPS aron mailhan ug madakpan ang responsable sa insidente.