Gibutyag sa Department of Justice (DOJ) nga ang pagka-absuwelto ni kanhi magbabalaod Arnolfo Teves Jr. sa usa ka kaso sa pagpatay niadtong 2019 walay epekto sa iyang giatubang nga mga kasong murder kalabot sa pagpamatay kang Negros Oriental Governor Roel Degamo niadtong 2023.
Sumala pa ni DOJ spokesperson Atty. Polo Martinez, ang mga kaso may kalabotan kang Degamo bulag ug nagpadayon pa busa gipasabot niini nga pabilin gihapon nga mabilanggo si Teves.
Giklaro ni Martinez nga ang kaso bahin kang Degamo lahi ra sa maong kaso ug ang pagka-absuwelto ni Teves niadtong Biyernes dili makaapekto sa nagpadayon nga proseso sa Degamo case.
Si Teves ug ang duha niini ka kauban naabsuwelto sa 2019 murder case sa usa ka Provincial board member sa Dumaguete City human midesisyon ang Manila Regional Trial Court Branch 15 nga kulang ang ebidensya aron sila mapamatud-ang sad-an.Bisan pa man niini, giatubang gihapon ni Teves ang daghang kaso kalabot sa Pamplona massacre niadtong Marso 2023, lakip na ang 10 counts sa murder, 13 counts sa frustrated murder ug 4 counts sa attempted murder.
Kahinumduman nga si Governor Degamo ug laing siyam ka kauban niini namatay sa maong pag-atake. Giila sa mga awtoridad si Teves isip usa sa mga gidudahang mastermind sa likod sa maong krimen. Gawas niini, gitudlo usab si Teves isip usa ka terorista sa Anti-Terrorism Council niadtong Hulyo 2023 diin misulay kini sa pag-ikyas sa gawas sa nasud apan nabalik ra sa Pilipinas niadtong Mayo 2025.