Pormal na nga gipasakaan sa Office of the Ombudsman og kasong graft ug malversation ang kanhi Senador nga si Ramon “Bong” Revilla Jr. lakip ang unom (6) ka opisyal sa Department of Public Works and Highways (DPWH) sa Bulacan.
Kini may kalabutan sa giingong “ghost project” o wala matuman nga flood control project sa Pandi, Bulacan nga nagkantidad og ₱92.8 million. Sumala sa Assistant Ombudsman nga si Mico Clavano, gipasaka ang maong mga kaso sa Sandiganbayan human makit-an sa imbestigasyon nga bisan og wala’y nahitabo nga konstruksyon, gideklarar kini nga natapos na aron mapagawas ang pondo.
Lakip sa mga gikasohan mao ang mga opisyal gikan sa DPWH Bulacan 1st District Engineering Office nga silang:
- Assistant District Engineer Brice Hernandez
- Engineer Jaypee Mendoza
- Engineer Arjay Domasig
- Engineer Emelita Juat
- Accountant Juanito Mendoza
- Cashier Christina Pineda
Gawas sa graft, gipasakaan usab sila og kasong Malversation of Public Funds through Falsification of Public Documents, diin wala’y gitugot nga piyansa (no bail recommended) alang niini.
Gihangyo usab sa Ombudsman sa Sandiganbayan ang dinaliang pagpagawas og warrant of arrest ug Hold Departure Order (HDO) batok kang Revilla ug sa iyang mga kauban.
Samtang, padayon nga gihimakak ni Revilla ang maong mga pasangil ug miingon nga duna’y motibo sa politika luyo sa maong mga kaso.