Gipasabot ni Senator Juan Miguel “Migz” Zubiri nga sayo pa kaayo aron mohatag og komento mahitungod sa mga hungihong sa impeachment batok kang Presidente Ferdinand Marcos Jr. ug Vice President Sara Duterte.
Atol sa usa ka interview, gipatin-aw sa senador nga isip mga miyembro sa Senado, sila ang posibleng molingkod isip mga huwes o juror kon ugaling moabot ang kaso sa ilang korte. Tungod niini, gikinahanglan ang paglikay sa bisan unsang pamahayag nga magpakita og bias aron mapabilin ang integridad sa proseso.
Matod sa senador, ang Senado posibleng molihok isip impeachment court, busa kinahanglan magpabiling maampingon ug walay bias ang mga senador samtang gihulatan ang desisyon sa House of Representatives.
Giingon niya nga dili popular sa Mindanao ang pagpadayon sa impeachment ug mas angay nga tutukan ang mga kaso sa giingong pagpangawat og bilyon-bilyong pondo sa gobyerno.
Gipahayag ni Zubiri ang bug-os nga suporta sa imbestigasyon sa flood control projects sa Senado, ug mipahimangno nga ubos sa bag-ong perjury law, ang mga saksi nga mamakak ubos sa panumpa mahimong silotan og unom hangtod napulo ka tuig nga pagkabilanggo.
Gidugang usab niya nga ang prayoridad sa iyang lehislatura mao ang edukasyon ug imprastraktura, lakip na ang classroom building program sa DepEd nga mas paspas ug accountable karon pinaagi sa direktang pondo sa LGUs.