Gipanghimakak sa kampo sa kanhi Department of Public Works and Highways (DPWH) engineer nga si Brice Hernandez ang balita nga iyang gibawi (recantation) ang iyang testimonya kabahin sa mga anomalya sa flood control projects.
Sumala sa iyang abogado nga si Atty. Ernest Levanza, dili tinuod ang giingon nga recantation ug ilang iklaro ang isyu sa pagdungog sa Senate Blue Ribbon Committee karong Enero 19.
Matod usab ni Sen. Panfilo Lacson, chairman sa Blue Ribbon Committee, nga hisgutan ang maong isyu ug nagpasidaan nga kinsa man ang mobawi sa testimonya mahimong manubag sa perjury gumikan gipanumpaan ang mga pahayag niini.
Giklaro usab sa Department of Justice (DOJ) nga wala pa nila madawat ang affidavit gikan kang kanhi DPWH District Engineer Henry Alcantara nga nagbawi sa iyang testimonya.
Sumala sa ahensiya, wala usab sa iyang counter-affidavits nga giingon nga gibawi niya ang iyang mga una nga pahayag, bisan pa man kaniadto iyang gipanghimakak ang pagkaapil sa mga ghost flood control projects.