Gimanduan ni Presidente Ferdinand Marcos Jr. ang nagkalain-laing ahensya sa kagamhanan nga pangitaan og paagi ang dinaliang pagpauli nila ni kanhi Cong. Arnolfo Teves Jr. ug kanhi Presidential Spokesperson Harry Roque ngadto sa Pilipinas.
Matud pa ni DILG Secretary Jonvic Remulla,nga usa ka hagit ang pagpabalik ni Teves gikan sa Portugal tungod kay walay naglungtad nga extradition treaty ang Pilipinas sa maong nasud. Tungod niini, gisusi karon sa gobyerno ang pakig-alayon sa Interpol, United Nations ug uban pang international mechanisms isip alternatibo
Matud ni Remulla, bisan og dugay ang proseso sa pagmugna og treaty, ang kamanduan sa Presidente mao ang pagpangita og shortcut o mas paspas nga legal nga dalan.
Gihisgotan usab ang monitoring nga nagkanayon nga naggamit si Teves og Portuguese passport butang nga giberipika pa sa kasamtangan.
Dugang pa, gipaspasan na usab ang lihok batok ni Harry Roque kansang pasaporte gikatahong kanselado na. Gilauman sa kagamhanan nga pinaagi niini, masayon ang pagpugos kanila nga moatubang sa balaod sa Pilipinas.
Kasamtangan, ang koordinasyon sa Department of Justice (DOJ) ug Department of Foreign Affairs (DFA) nagpabiling hugot aron masiguro nga mahatagan og hustisya ang mga kasong giatubang sa nahisgutang mga personalidad.