Malampusong narekober sa Independent Commission for Infrastructure (ICI) ang pipila ka mga luxury vehicles nga giingong gipanag-iya ni kanhi Cong. Zaldy Co human makadawat og impormasyon gikan sa usa ka concerned citizen.
Matud ni ICI Special Advisor General Rodolfo Azurin Jr., usa ka wala mailhing indibidwal ang personal nga miadto sa ilang opisina sa miaging tuig aron itudlo ang nahimutangan sa mga sakyanan sa usa ka condominium sa Taguig City.
Human sa beripikasyon sa Land Transportation Office (LTO) ug koordinasyon sa Bureau of Customs, gilusad ang operasyon aron makuha ang maong mga kabtangan. Gidugang ni Azurin nga duna pay usa ka silver Toyota Land Cruiser nga padayong gipangita sa mga otoridad nga nalambigit gihapon sa kumpanya sa kanhi kongresista.
Kini nga lakang kabahin sa mas lapad nga imbestigasyon sa gobyerno kalabot sa bilyon-bilyong pesos nga flood control scandal.
Matud ni Atty. Renato Aboy Paraiso, chairman sa Technical Working Group sa ICI, ang ilang prayoridad mao ang pagpanubag sa mga sad-an ug ang pagbawi sa mga kabtangan sa panudlanan sa Gobyerno.
Bisan pa sa agresibong asset recovery, giklaro sa komisyon nga dili pa sila makasugod sa mga pormal nga hearings o referrals tungod kay usa na lang ang naglingkod nga commissioner sa ICI sa kasamtangan.
Nagpaabot pa ang buhatan og bag-ong mga itudlo nga commissioners aron hingpit nga mapadayon ang legal nga proseso sa maong kaso.