Gisaway ni House Deputy Minority Leader ug ACT Teachers Party-list Rep. Antonio Tinio ang pamahayag ni Navotas City Representative Toby Tiangco nga dili kini mupirma sa bag-ong impeachment complaint batok kang Vice President Sara Duterte hangtod nga walay madakpan nga “big fish” o dakong personalidad nga nalambigit sa flood control scandal.
Para kang Tinio, ang argumento ni Tiangco susama ra sa mga “DDS” o Die-hard Duterte Supporters nga naggamit sa isyu sa flood control isip depensa para sa bise presidente.
Giinsistir ni Tinio nga kinahanglan mupatigbabaw ang accountability ilabi na nga dili basta-basta ang mga alegasyon sa korapsyon batok kang VP Sara.
Gipasabot ni Tinio nga ang tanang pasangil sa kawat sa gobyerno batok sa mga tag-as nga opisyal kinahanglan nga imbestigahan og maayo.
Lakip na niini ang giingong iregularidad sa paggamit ni VP Sara sa kwarta sa katawhan, nga matud pa niini, kinahanglan hatagan og seryosong aksyon sa Kongreso.