Gipahibalo sa Land Transportation Office (LTO) nga ang digital driver’s license nga makuha pinaagi sa Land Transportation Management System (LTMS) giila na karon isip opisyal ug balidong dokumento alang sa mga motorista sa tibuok nasud.
Sumala sa taho gikan sa buhatan ni LTO Chief Assistant Secretary Markus V. Lacanilao, mahimo nang ipresenta sa mga drayber ang ilang electronic license (e-driver’s license) kon parahon sila sa mga awtoridad alang sa inspeksyon o kon makahimo sila og kalapasan sa trapiko. Kini nga polisiya subay sa Department of Transportation (DOTr) Department Order No. 2023-015.
Gimanduan sa kadagkoan sa LTO ang tanang enforcer ug mga deputized agents niini nga kinahanglan nilang dawaton ang digital nga bersyon isip puli sa pisikal nga plastic card. Gipasiugdahan sa ahensya nga ang maong lakang kabahin sa paningkamot sa gobyerno nga i-modernize ang ilang serbisyo pinaagi sa digitalization.Bisan pa man niini, nagpagula og klarong pahinumdom ang LTO ngadto sa publiko.
Matud sa ahensya, ang mga lehitimong digital license lamang nga gi-access direkta gikan sa opisyal nga LTMS account sa drayber ang dawaton sa mga enforcer.Giklaro sa LTO nga dili nila ilhon ang mga screenshot, hulagway o photocopy sa digital ID.
Kinahanglan nga ipakita sa motorista ang live nga bersyon sa iyang lisensya gikan sa portal aron masiguro nga kini tinuod ug dili peke.
Pinaagi niini, gilauman nga mas mapadali ang transaksyon sa dalan ug mahatagan og alternatibong solusyon ang mga motorista samtang gipaningkamutan sa ahensya ang pag-atiman sa supply sa mga plastic cards.