Nasikop ang lima (5) ka indibidwal sa managlahing operasyon sa kapulisan sa pipila ka lungsod ug syudad sa Bukidnon tungod sa ilegal nga droga.
Lakip niini ang mga lugar sa Malaybalay City, Kibawe, Quezon, Valencia City ug Malitbog kaniadtong Enero 11 hangtud 13, 2026.
Ang mga operasyon gipahigayon sa nagkadaiyang yunit sa kapulisan nga misangpot sa pagkadakop sa mga suspetsado ug pagkarekober sa daghang ebidensya.
Ang mga nadakpan mao sila alyas Dodong, 18-anyos sa Purok 1, Barangay Kiburiao, Quezon, alyas Taweng, 29-anyos, sa Purok 4, Barangay Aglayan, Malaybalay City, alyas Jun nga taga P-4, Barangay East Kibawe, Kibawe Bukidnon alyas Ali, 37-anyos, sa Purok 13, Poblacion, Valencia City, ug alyas “Sam-Sam”, 20-anyos, sa Zone 1, Barangay Poblacion, Malitbog, Bukidnon.
Sa kinatibuk-an, nakumpiska sa kapulisan ang kapin 35.674 gramos nga iligal nga droga nga naglangkob sa shabu ug marijuana, nga may kabilingang standard drug price nga Php209,183.00.
Giandam na ang mga kaso batok sa tanang nadakpan alang sa paglapas sa Sections 5 ug 11, Article II sa Republic Act 9165 samtang gipadala na sa forensic laboratory ang mga narekober nga droga alang sa eksaminasyon.