Nakakuha og atensyon sa mga residente sa Brgy. Suba Poblacion, sakop sa lungsod sa Argao, Cebu ang hilabihan ka-bongga nga kasaulugan sa ika-85 anyos nga adlaw’ng natawhan ni Lola Juling, tungod kay karon pa nahitabo ang ingon niini -nga kaabundang handa.
Nasayran nga dili lang usa, duha, tulo o napulo, kondili 20 ka litsong baboy ang gihanda sa mga anak ug apo ni Lola Juling, gawas pa sa gi-ihaw nga upat ka baboy ug usa ka tibuok litsong baka.
Sumala sa mga nanambong, nagbaha ang mga pagkaon dili lang sa nataran sa balay sa birthday celebrant kondili lakip na sa mga kalsada, gumikan gipakaon ang tanang silingan ug mga tagalaing barangay.
Tungod sa kaabunda sa mga handa, ang tanang bisita nga hastang busoga, nakaputos pa ug gidala sa ilang pamilya, hinungdan nga kini nahimong usa ka dili makalimtan nga community celebration nga gikabiliban sa tanang nakaapil ug bisan sa mga nakatan-aw lamang sa mga post sa maong kalihukan.