Gipahayag ni U.S. President Donald Trump nga abli ang Iran nga makig-negosasyon sa Washington human siya manghulga nga mogamit og pwersa batok sa Islamic Republic. Sumala ni Trump, ang Iran mismo ang nagpahayag og tinguha nga makig-istorya taliwala sa nagpadayon nga madugo nga mga protesta sa maong nasod.
Kini nga mga demonstrasyon nagsugod tungod sa kalisod sa ekonomiya ug sa pag-ubos sa bili sa ilang kwarta (rial), apan misangpot kini sa kagubot diin daghan na ang nakalas.
Gikataho nga abli ang Iran sa negosasyon bahin sa ilang nuclear program ug uban pang mga isyu, ilabi na human ang Estados Unidos ug Israel mipahigayon og mga airstrike sa pipila ka nuclear sites sa Iran niadtong miaging tuig.
Bisan pa niana, nagpabilin ang pasidaan ni Trump nga andam manghilabot ang Amerika kon magpadayon ang pagpamatay sa mga nagprotesta.
Sa pikas bahin, ang mga opisyal sa Iran mibutyag nga abli gihapon ang ilang komunikasyon sa Amerika apan kinahanglan nga ang dayalogo base sa “mutual interest” ug dili kay diktahan lang sila sa Washington.