Gipahibalo ni Department of Public Works and Highways (DPWH) Sec. Vince Dizon nga usa sa mga nag-unang prayoridad sa ahensya karong tuiga 2026 ang rehabilitasyon sa Maharlika Highway.
Gigahin sa ahensya ang gibana-banang P16B ka pesos para sa pag-ayo sa maong kalsada, nga giilang pinakataas nga highway sa nasud nga nagkonektar sa Luzon, Samar, Leyte ug Mindanao.
Matud ni Dizon, importante nga mabalik sa maayong kondisyon ang dalan aron matubag ang nagkagrabe nga problema sa mga kalsada ug tulay sa tibuok nasud.
Dungan niini, gikumpirma usab niini ang pag-ilis sa mga opisyal sa DPWH isip kabahin sa reporma sa ahensya.
Walo na ka opisyal ang gitangtang sa pwesto samtang nagpadayon ang imbestigasyon sa giingong anomaliya sa mga flood control projects. Ang mga gitaktak naglakip sa (4) ka Regional Directors (2) ka Assistant Regional Directors ug (2) ka District Engineers. Duna usab tulo ka District Engineers ang wala nakapasar sa qualification standards sa Civil Service Commission.
Tungod niini, gipahibalo ni Dizon nga magpagawas sila og mas estrikto nga mga rekisitos para sa mga opisyal sa ahensya sa umaabot nga mga adlaw.
Sa laing bahin, gipahibawo usab ni Dizon nga motestigo kini sa Sandiganbayan karong Enero 20 kalabot sa kaso ni kanhi Konggresista Zaldy Co nga nallambigit sa giingong iregularidad sa flood control project sa Oriental Mindoro.
Nanawagan usab kini sa publiko nga ipahibalo sa ilang buhatan kung duna silay makit-an nga mga guba o wala nahuman nga kalsada sa ilang mga lugar aron mahatagan dayon og aksyon.