Nasikop na karung adlawa ang gikaingong suspek sa brutal nga pagpatay sa usa ka 15-anyos nga Grade 9 student nga si Jennifer Encarnacion kansang lawas nga wala nay ulo ang napalgan sa usa ka katubhan sa Sitio Sinait, Barangay Dagat-Kidavao, Valencia City.
Gikumpirma ni Barangay Dagat-Kidavao Chairperson Rogelio Adoracion nga ang suspek, usa ka 38-anyos nga giilang si Marlon Abdon, nga trabahante sa katubhan ug residente sa Purok Sinait, nadakpan pinaagi sa hiniusang manhunt operation sa kapulisan, kasundalohan, mga opisyal sa barangay, ug mga lider sa Indigenous Peoples (IP).
Sumala pa ni Adoracion, nalukong ang suspek sa hilit nga bahin duol sa Barangay Banlag sa tabang sa usa ka Bagani o tribal warrior leader.
Kini nga kalambuan giatangan sa tibuok komunidad human ang biktima, kinsa estudyante sa Buco-Sinait Integrated School, gideklarang missing niadtong Enero 6.
Sa pakighinabi sa Bombo Radyo Malaybalay sa usa ka tribal leader nga uban sa pagsikop sa suspetsado, gibutyag ni Datu Mario Mansaloon sa sitio Santo Domingo barangay Lumintao Quezon Bukidnon nga ang mga bagani maoy nakigkoordina sa pamilya alang sa pagsurrender sa suspetsado nga gikaingong mipatay sa biktima.
Dugang pa ni Datu Mansaloon, gikumpirma niini nga ang maong suspetsado aduna na usab kasong giatubang kaniadto sa pagpatay ug pagsunog sa iyang anak.
Sa pagkakaron, temporaryo nga gipaubos sa interogasyon ang suspetsado sulod sa Valencia City Police Station human nga giingong midangop sa mga lumad didto sa Purok-6 Buco Banlag Valencia City karong adlawa Enero 10, 2025.