Nagpasaka og petisyon sa Korte Suprema sila Mamamayang Liberal Party-list Rep. Leila De Lima ug Caloocan 2nd District Rep. Edgar Erice kagahapong adlawa batok sa gitawag nga “unprogrammed appropriations” nga nalakip sa 2026 General Appropriations Act (GAA).
Gipasaka sa duha ka magbabalaod ang petition for certiorari and prohibition aron kuwestiyonon ang legalidad ug konstitusyonalidad sa unprogrammed funds sa national budget karong tuiga. Matod ni Rep. De Lima, dili igo ang gihimong pag-veto ni Presidente Ferdinand “Bongbong” Marcos Jr. sa ₱92.5 bilyon, tungod kay anaa pa’y kapin ₱150 bilyon nga unprogrammed funds nga nahabilin ug nalakip gihapon sa 2026 national budget.
Tungod niini, gihangyo sa mga petisyoner ang Korte Suprema nga klarohon kon uyon ba sa Konstitusyon ang pag-apil og unprogrammed appropriations sa GAA, ug kon angay ba kining ipatuman.
Lakip sa ilang gihangyo ang pag-isyu og Temporary Restraining Order (TRO), Writ of Preliminary Injunction, o Status Quo Ante Order aron mapahunong ang implementasyon sa maong pondo.
Gihangyo usab nila ang Korte Suprema nga ideklarar nga unconstitutional ang Section 14 sa Republic Act No. 1214 o ang 2026 GAA, ilabi na ang probisyon nga nagtugot sa unprogrammed appropriations, kay matod pa ni De Lima, kon dili kini maresolba, mahimong magpadayon ang pag-abuso sa pondo sa katawhan.