Mikabat na sa kinatibuk-ang 655 ang ihap sa mga natala nga fireworks-related injuries sa tibuok nasod tungod sa pagpabuto sa pagsaulog sa Pasko ug Bag-ong Tuig, sumala sa Department of Health (DOH).
Kini base sa nagpadayong pagkolekta og datos sa DOH-Epidemiology Bureau diin natala gikan sa Disyembre 21, 2025, hangtod Enero 3, 2026 ang maong ihap. Sa mga biktima, 351 niini ang nag-edad og 19 paubos, ug silang tanan nakasinati og nagkalain-laing matang sa paso ug samad. Base pa sa datos sa ahensya, 19 ka tawo ang naputlan og kamot o tudlo, diin 11 niini mga menor de edad. Ang kamanghuran nga biktima usa ka upat ka tuig nga bata nga nawad-an og tudlo sa iyang tuong kamot.
Kadaghanan sa mga kaso naggikan sa wala matino nga matang sa pabuto tungod kay dili na mahinumduman o mailhan sa mga biktima ang ilang gigamit. Gisundan kini sa mga insidente ngasagad sa kwitis ug ang ilegal nga 5-star.
Bisan pa niini, gibutyag sa DOH nga ang kasamtangang ihap 20 porsiyento nga mas ubos itandi sa 819 ka kinatibuk-ang kaso nga natala niadtong Enero 3, 2025.
Gipahinumdoman usab ang publiko nga dad-on dayon sa labing duol nga balay tambalananl ang bisan kinsa nga mabuthan aron makadawat og libreng bakuna batok sa tetanus, nga kinahanglang ikahatag sulod sa 8 hangtod 21 ka adlaw.