Andam na ang Filipina tennis star nga si Alexandra “Alex” Eala para sa ASB Classic sa New Zealand, diin makasangka niya sa karong Lunes ang Croatian Olympic silver medalist nga si Donna Vekic.
Ang 20-anyos nga si Eala, nga karon naa sa ika-53 nga pwesto sa Women’s Tennis Association (WTA) rankings, mosulod sa torneo isip ika-upat nga seed, sunod kang Ukrainian Elina Svitolina ug sa mga Amerikanang sina Emma Navarro ug Iva Jovic.
Si Vekic, 29 anyos, nakaabot kaniadto sa career-high singles ranking nga No. 17 ug karon naa sa No. 69.
Aduna usab siya og upat ka WTA singles titles ug giila isip usa ka beteranang magdudula sa women’s tour.
Gawas sa singles, moapil usab si Eala sa doubles event kauban si Iva Jovic.
Sa ilang opening match, makaatbang nila ang tennis icon ug kanhi world No. 1 nga si Venus Williams, kauban si Svitolina.
Kahinumduman nga nakasulod si Eala sa ASB Classic human sa usa ka makasaysayang 2025 season, diin unang higayon siyang nakasulod sa WTA Top 100, nakadaog sa iyang unang WTA 125 title, ug nakahakot og gold medal sa Southeast Asian Games.