Nakaangkon og samad sa lawas ang usa ka 20 anyos nga pedestrian sa Sayre Highway, Purok 9, Mailag, Valencia City, Bukidnon human mabanggaan og motorsiklo.
Ang motorsiklo, gimanehuan sa 30 anyos nga lalaki, nagabiyahe gikan sa General Santos City paingon sa Alae, Manolo Fortich samtang ang pedestrian naglakaw sa tunga sa dalan.
Matud sa inisyal nga imbestigasyon, nakabantay ang drayber sa presensya sa pedestrian ug kalit nga mibira og preno, apan tungod sa kusog sa dagan ug kulang nga oras sa pagreak, nadaganan niini ang pedestrian ug natumba sa dalan.
Tungod sa insidente, nakaangkon ang biktima og grabeng samad sa ulo ug ubang bahin sa lawas ug gilayong gidala sa Barangay Mailag rescuers ngadto sa Polymedic Hospital sa Valencia City alang sa tukmang medikal nga atensyon.
Namatikdan usab nga ang pedestrian adunay baho sa alkohol nga nagpasabot nga posibleng ilawom siya sa impluwensya sa makahubog nga ilimnon, samtang ang drayber ug ang motorsiklo gidala sa Valencia CPS alang sa hustong disposisyon.