Gipanghimakak sa liderato sa Kamara ang mga nanggawas nga impormasyon bahin sa usa ka kudeta batok ni House Speaker Boji D. Sumala ni House Assistant Majority Leader Zia Alonto Adiong, nagpabiling lig-on ug nagkahiusa ang mga kongresista taliwala sa mga pagsulay sa pagtangtang sa kasamtangang liderato.
Nitumaw ang maong isyu tungod sa giingong dili pagka-kuntento sa pipila ka magbabalaod sa istilo sa pagdumala ni Speaker D, kinsa gikumpara ni kanhi Speaker Martin Romualdez.
Adunay mga reklamo nga si Speaker D giingong mas pilion lang ang iyang “inner circle” ug lisod duolon, apan kini hugot nga gihimakak ni Adiong.
Gawas sa isyu sa liderato, nalambigit usab ang Kamara sa mga kontrobersya sama sa flood control scandal ug ang giingong P2 million Christmas bonus para sa pipila ka kongresista.
Bisan pa niini, gipasalig sa kampo sa Speaker nga nakatutok gihapon ang Kamara sa ilang trabaho, ilabi na sa pagpasar sa National Budget.