Nanawagan ang suspendidong si Cavite Rep. Kiko Barzaga nga imbestigahan ang kamatayon ni Dueñas, Iloilo Vice Mayor Amy Pas-Lamasane.
Matod ni Barzaga, suspisyoso ang timing sa pagpanaw sa bise alkalde ug duna kini posibleng kalabutan sa iyang nahibaloan bahin sa mga anomaliya sa flood control projects sa Iloilo.
Gidugang ni Barzaga nga ang maong imbestigasyon kinahanglang motutok usab sa mga iladong opisyal sa probinsya nga giingong nalambigit sa korapsyon. Sa pagkakaron, wala pa’y tubag ang kampo sa mga gihisgutang opisyal.
Kahinumduman nga namatay ang bise alkalde niadtong Disyembre 31 human ang usa ka aksidente sa pagpamusil sa iyang kaugalingon.
Sa laing bahin, nagpabiling suspindido si Barzaga human siya siloti sa House Ethics Committee og 60 ka adlaw nga suspensyon niadtong Disyembre 1, 2025.
Kini tungod sa iyang “unethical behavior” o dili maayong binuhatan sama sa sige-sige nga pag-atake sa gobyerno ug pag-post og mga malaw-ay nga hulagway sa mga babaye nga naka-bikini sa social media.