Hugot nga gihimakak sa Office of the Ombudsman ang mga nanggawas nga impormasyon sa social media nga matud pa gidala sa balay tambalanan ang kasamtangang Ombudsman.
Sa pakighinabi sa Bombo Radyo kang Assistant Ombudsman Atty. Mico Clavano, giklaro niini nga walay kamatuoran ang maong mga taho ug giisip kini nga “fake news”.
Sumala pa ni Clavano, anaa sa maayong panglawas ang opisyal ug gani nikaon pa kini og masustansyang pagkaon kagahapon sa buntag.Dungan niining maong isyu, gipasalig sa buhatan nga nagpadayon ang ilang lawom nga imbestigasyon kalabot sa korapsyon sa flood control projects sa nasud.
Gitino sa Ombudsman nga pasakaan gayod og kaso ang mga korap nga opisyal nga nalambigit sa maong anomaliya.Gihisgutan usab ni Clavano ang mahitungod sa “Cabral Files” nga nakuha human sa kalit nga kamatayon ni kanhi DPWH Undersecretary Catalina Cabral. Matud sa abogado, ang maong files kabahin lamang sa mas dako nga imbestigasyon ug kinahanglan pa kining susihon og maayo aron masuta kon ang mga proyekto tinuod ba nga na-implementar o nahulog ba kini nga “ghost projects”.
Gipasabot usab sa Ombudsman nga ang mga “insertions” sa dokumento dili awtomatikong illegal. Mahimo lamang kining kriminal nga buhat kon mapamatud-an nga adunay pagpanglimbong ug sayop nga paggamit sa pundo.Nanawagan ang buhatan sa publiko nga tugotan ang imbestigasyon nga molihok base sa tinuod nga mga ebidensya ug husto nga proseso.