Padayun ang kapulisan sa pagpangita sa suspek nga nanulis ug mipatay sa usa ka driver sa baligyanan og prutas sa Barangay Aglayan, Malaybalay City.
Sa ginahimong imbestigasyon sa kapulisan, ginatan-aw ug ginareview ang mga CCTV footage nga posibleng makatabang sa pag-ila sa mga responsable sa pagpanulis ug pagpamusil.
Sumala ni PMSG. Ken Hanzel Bughaw, ang pagpanulis ang unang gitan-aw nga motibo sa krimen, apan dili pa nila isira ang ubang posibleng motibo samtang nagpadayon ang pagkuha ug dugang impormasyon sa maong kaso.
Kahinumduman, nga namatay ang usa ka driver sa usa ka tindahan sa prutas nga giila nga si Ranel Arenga human siya gipusil sa ulo sa tulo ka wala pa mailhing mga tulisan niadtong Disyembre 31, 2025, alas 9:00 sa gabii, sa Barangay Aglayan, Malaybalay City.
Nasayran nga gikuha gikan sa biktima ang iyang cellphone ug ang halin sa tindahan, nga gibanabanang mokabat sa kapin 100,000 pesos.