Miabot sa kapin 30 ka mga tawo ang angol human gidaro sa oil tanker ang unom ka sakyanan lakip na ang usa ka bus unit sa Rural Transit sa national highway sa Brgy. Baliwagan, Balingasag, Misamis Oriental, pasado alas 7 kagabii.
Base sa inisyal nga report sa mga miresponde nga personahe sa Bureau of Fire Protection Balingasag, gituohang nawad-an og preno ang tanker nga mibangga sa poste nga midamay pa sa usa ka de-pasayruan nga van nga puno sa pasahero, ug laing tulo ka pribadong sakyanan.
Tungod sa kadako sa namugnang kadaut, misaad si Misamis Oriental Congressman Bambi Emano nga tabangan ang mga pamilya sa mga na-angol ug abagahon ang gasto sa ospital samtang nagpadayon ang imbestigasyon sa kapulisan aron manubag ang sad-an sa maong insidente.