Padayon ang ginahimong hot pursuit operation sa kapulisan alang sa pagpangita sa suspek sa brutal nga pagpangdunggab sa Purok 1, Barangay Kalasungay, Malaybalay City, ning lalawigan.
Giila ang suspek nga si Jason Galolo, 30 anyos. Samtang ang namatay nga biktima si Oliver Sigod, 55 anyos, ug ang laing duha ka biktima nga manag-igsoon nga sila si Amelito Maghinay, 57 anyos, ug si Pedrito Maghinay Jr., 32 anyos.
Sa eksklusibong pakighinabi sa Bombo Radyo Malaybalay kang Charlito Sigod, igsoon sa namatay nga biktima, gikumpirma niini nga silingan sa laing duha pa ka biktima ang suspek sa nahisgutang lugar.
Matud pa niini, nag-inom ang mga biktima uban ang suspek diin gikaingong nakisampa lamang kini ang suspek.
Dugang pa niini, nga nakauli pa ang igsoon niini sa ilang panimalay gumikan nagkuha og kwarta ug nibalik sa balay sa manag-igsoong biktima ug didto nahitabo na ang maong pagpangdunggab.
Patay sa lugar si Oliver Sigod, samtang ang duhang manag-igsoon anaa sa kritikal nga kahimtang.
Kahinumodman nga nahitabo ang maong pagpangdunggab kagabii, December 29, 2025 at 8:00 PM.