Nagpagawas ang National Bureau of Investigation (NBI) og bag-ong dash cam footage nga gituohan nga nagpakita sa katapusang mga oras sa kinabuhi sa kanhi Department of Public Works and Highways (DPWH) Undersecretary Catalina Cabral.
Ang maong footage adunay petsang December 18, 2025, ang adlaw nga namatay ang kanhi opisyal.
Nakuha kini gikan sa alas-3:25 sa hapon hangtod alas-3:26 sa hapon.
Makita sa bag-ong footage ang usa ka babaye nga naglingkod sa kilid sa dalan, taliwala sa mga concrete barrier, nga direktang nag-atubang sa lalom nga pangpang.
Sa timestamp nga 15:25:37 sa footage, makita ang naglingkod nga babaye sa kilid sa dalan, nga gituohan nga si Cabral, ug ang sinina niini parehas sa katapusang gisul-ob sa kanhi opisyal.
Sa laing bahin, una nang nagpagawas ang mga otoridad og CCTV footage sa Ion Hotel, diin temporaryo nga nagpuyo si Cabral ug ang iyang driver sa maong adlaw.
Sa video, makita nga nilakaw ang duha gikan sa ilang kwarto, mga pasado alas-2 sa hapon.
Kung balikan ang unang pamahayag sa driver ni Cabral nga si Ricardo Muñoz Hernandez, mga alas-2 hangtod alas-3 sa hapon siya mibiya sa kanhi opisyal sa Kennon Road, Sitio Maramal, Camp 5, Barangay Camp 4, sa lungsod sa Tuba, Benguet.
Nahitabo kini human sila mibiya sa Ion Hotel sa Baguio City.