Gipaniguro karon sa Police Regional Office 10 nga napahamtangan og tukmang silot ang usa ka pulis nga nalambigit sa insidente sa indiscriminate firing atol sa adlaw sa Pasko.
Sa eksklusibong pakighinabi sa Bombo Radyo Malaybalay kang PBGen. Christopher Abrahano, Regional Director sa Police Regional Office X, gibutyag niini nga ang maong pulis naka-assign sa Opol Municipal Police Station ug residente sa Cagayan de Oro City.
Sumala sa inisyal nga imbestigasyon, samtang anaa ang maong pulis sa panimalay niini sa Cagayan de Oro City, adunay nahitabo nga komosyon tali niini ug sa iyang silingan kaniadtong Disyembre 25, 2025.
Tungod sa maong insidente, mibunot ug nagpabuto kini sa armas. Matud ni PBGen. Abrahano, dili tolerahon sa kapulisan ang bisan unsang porma sa iresponsableng paggamit sa armas, hinungdan nga gipahamtangan na ang maong pulis og mga kasong kriminal ug administratibo, ug gikaingon nga posible kining matangtang sa serbisyo subay sa resulta sa padayong imbestigasyon.