Hingpit nang giaprubahan sa Bicameral Conference Committee ang P6.793 trilyon nga nasudnong budget alang sa tuig 2026. Gipirmahan sa mga representante gikan sa Senado ug Kamara ang bicameral report human sa deliberasyon didto sa PICC, Pasay City.
Sumala ni House Appropriations Chair Mikaela Suansing, nakatutok ang maong budget sa human capital development ug transparency. Gihisgotan usab ni Senate Finance Chair Sherwin “Win” Gatchalian nga dako ang alokasyon alang sa edukasyon, panglawas, ug agrikultura.
Kini ang unang higayon nga gihimong abli sa publiko ang bicam deliberations pinaagi sa livestream. Tumong niini nga malikayan ang mga anomaliya ug madugangan ang pagsalig sa katawhan sa proseso sa budget.
I-ratipika sa Senado ug Kamara ang bicameral report karong Disyembre 29, ug gilauman nga pirmahan ni Presidente Ferdinand Marcos Jr. ang General Appropriations Act sa unang bahin sa Enero 2026.