Gideklarar sa Bureau of Fire Protection (BFP)–Malaybalay City nga malinawon ug luwas ang selebrasyon sa Pasko sa syudad human walay gikataho nga dakong sunog, tungod sa epektibong pagpakatap sa impormasyon sa luwas na sunog.
Sa pakighinabi sa Bombo Radyo Malaybalay kay FO3 Brent Clyde Suico, Media Relations Officer sa Malaybalay City fire station na matod pa epektibo ang ilang recorrida ug social media posts bahin sa fire safety ug alternatibo sa paggamit sa pabuto, hinungdan nga walay fire incident sulod sa ilang hurisdiksiyon niadtong Pasko ug sa umaabot na bag-ong tuig.
Gibutyag usab niini nga ang BFP Malaybalay nagpabilin sa Red Alert status hangtod Enero 3, diin ang mga bombero anaa sa 24-oras nga kahimtangan sa kahandam aron masiguro ang kaluwasan sa publiko ilabina sa holiday season.
Gidugang sa opisyal nga padayon nilang ipatuman ang Executive Order nga nagdili sa paggamit sa pabuto, ug gi-awhag ang katawhan nga mogamit og alternatibo sama sa torotot ug uban pang noise-making devices alang sa pagsaulog sa Bag-ong Tuig.
Gipangayo sa BFP Malaybalay ang kooperasyon sa katawhan aron malikayan ang sunog ug mapadayon ang kalinaw ug kaluwasan sa syudad sa pagsugat sa Bag-ong Tuig.