Gipadayag sa Hanabana Water Corporation ang plano sa pagtukod og Level 3 water system aron masulbad ang dugay nang problema sa kakulang sa suplay sa tubig sa tulo ka barangay sa Malaybalay City.
Sa pakighinabi sa Bombo Radyo Malaybalay kay Ramonito “Monching” Sagocsoc, Vice President sa Hanabana Construction and Equipment Corporation, mipadayag kani nga nakadawat na sila og resolution of no objection gikan sa Sangguniang Panlungsod aron makahatag og direktang suplay sa mainom nga tubig sa mga panimalay sa Barangay Patpat, Kalasungay, ug Sumpong—mga lugar nga kasamtangang kulang o lisod maserbisyuhan sa tubig.
Gilauman nga masugdan ang konstruksyon sa unang bahin sa tuig 2026 human makumpleto ang mga permit, ug magsugod ang distribusyon sa tubig sulod sa unom ka bulan human niini.
Gibutyag ni Sagocsoc nga ang proyekto dili kompetisyon sa PrimeWater ug Water District, kondili tabang aron mapalambo ang serbisyo sa tubig sa siyudad.
Kahinumduman nga gi-desisyonan sa Malaybalay City Water District (MCWD) ang pagtapos sa kontrata niini sa PrimeWater tungod sa kapakyasan sa serbisyo sa panubig sa Dakbayan sa Malaybalay.
Matod pa kay Engr. Nolito S. Binahon, General Manager, sa Malaybalay City Water District na gihimo ang desisyon sa MCWD Board of Directors atol sa ilang miting niadtong milabayng adlaw, human mapaso ang 90 ka adlaw nga extension nga gihatag sa PrimeWater aron matubag ang mga reklamo sa mga konsumidor.